ჩვენ გვიყვარს საქართველო... 

საქართველოს ნაკრებმა მისთვის სადებიუტო ევროპის ჩემპიონატი გამარჯვებით გახსნა. მოგებაცაა და მოგებაც – იგორ კოკოშკოვის გუნდმა ის ბელგია, რომელთანაც ევრობასკეტის შესარჩევ ტურნირში შარშან ორივე თამაში წააგო, ფინალურ ეტაპზე 22 ქულით გაანადგურა. ჩვენმა ნაკრებმა ყველა კომპონენტში დაჯაბნა ბელგია, არ ყოფილა ისეთი ეპიზოდი, როცა ქართველებს საქმე სათუოდ გაეხადათ – ჩვენი ნაკრების უპირატესობა პირველი მეოთხედიდან საფინალო სირენამდე იგრძნობოდა და აკი საამაყო გამარჯვებაც დაიმსახურა.

ქართველ გულშემატკივრებში დიდი იყო ბელგიელებთან მატჩის მოლოდინი. თითქმის ყველა აღიარებდა, რომ ეს შეხვედრა საკვანძო იყო. გულშემატკივრებს ახსოვდათ ბელგიელებთან შარშან წაგებული ორი მატჩი. საქართველოს ნაკრებმა კი აიღო და 22 ქულით გააცამტვერა ოპონენტი.

რა იოლი ყოფილა გამარჯვება, როცა გამართულად თამაშობ დაცვაში. კოკოშკოვის გუნდის წარმატება ულაპარაკოდ დაცვის დამსახურებაა. მატჩამდე არაერთ ინტერვიუსა თუ პირად ლაპარაკში ჩვენი ნაკრების წევრები ბელგიელთა სამქუნიანთა მაღალ პროცენტულობაზე ლაპარაკობდნენ. გულშემატკივარიც ყველაზე მეტად შორ სროლებს უფრთხოდა. გამართული ტაქტიკისა და სწორი დაცვის წყალობით საქართველოს ნაკრებმა ბელგიელებს ეს იარაღი მოუსპო. რაკი შორი სროლებით ფონს ვერ გავიდნენ, ბელგიელებს ფარქვეშ არაფერი გამოუვიდათ. ზაზა ფაჩულიან, ვიქტორ სანიკიძემ და ვლადიმერ ბოისამ პირწმინდად დაჩაგრეს სამწამიან ზონაში ყველა ოპონენტი.

ქართველებს ისე საიმედოდ ჰქონდათ დაცული საკუთარი სამწამიანი, ისე აკურატულად თამაშობდნენ საკუთარი ფარის სიახლოვეს, რომ ბელგიელებმა მატჩში პირველი საჯარიმო მესამე მეოთხედის დასრულებამდე 2 წუთითა და 22 წამით ადრე ესროლეს. კარგმა დაცვამ ქარტველებს შეტევაში გაუხსნა გზა. სიმართლე ითქვას, მეტოქის ფართან თამაში კოკოშკოვის გუნდს ყველაზე მეტად უიოლდება და ჩვენებმაც საიმედო დაცვის ფონზა ფრთები გაშალეს. შეტევაში გამოირჩეოდნენ სანიკიძე, ფაჩულია და ვლადიმერ ბოისა. ამ უკანასკნელმა გუნდის ყველაზე ახალგაზრდა წევრ თორნიკე შენგელიასთან ერთად ყველა სროლა ჩააგდო. ბოისამ 5–დან 5 ორქულიანი მიითვალა, შენგელიას კი 6–დან არც ერთი ორქულიანი არ აუცილებია. პლუს ამას თორნიკემ 1 საჯარიმოც ჩააგდო და თამაში 13 ქულით დაასრულა. ჩვენიანთაგან ერთადერთი ორმაგი დუბლის შემსრულებელი ვიქტორ სანიკიძეა, რომელმაც 13 ქულა, 11 მოხსნა და 4 პასი მიითვალა.

საქართველოს ნაკრების კარგი თამაშის წყალობით თამაშს აზრი საფინალო სირენამდე 6 წუთით ადრე დაეკარგა, როცა გიორგი ცინცაძის სროლის შემდეგ ჩვენების უპირატესობამ 22 ქულას მიაღწია. საბოლოოდ საქართველომ სწორედ 22 ქულით მოიგო და უკვე რუსეთთან სახვალიო მატჩზე გადაერთო.  

საქართველო: ფაჩულია 16, სანიკიძე 13ქ, 11მ, ვ. ბოისა 10, შერმადინი 7, ცინცაძე 8, ჰაინესი 4, შენგელია 13, მარკოიშვილი 5, ცქიტიშვილი 2, ა. ბოისა 2,  გამყრელიძე 1

ზაზა ფაჩულია:

„პირველ რიგში აღვნიშნავ, რომ ჩემთვის და მთლიანად გუნდისთვის დიდი პატივია ევროპის ჩემპიონატზე თამაში. ჩვენი ნაკრები ევრობასკეტზე პირველად მოხვდა და გუნდის ყველა წევრი სიამაყის გრძნობით იცავს ჩვენი ქვეყნის სახელს. ჩვენ დღეს პირველი მატჩი გავმართეთ ევროპის ჩემპიონატზე და პირველი გამარჯვება ვიზეიმეთ. რა თქმა უნდა, ძალიან გახარებულები ვართ. ჩვენმა ნაკრებმა მოახერხა ბელგიელი მსროლელების, დიმიტრი ლოუერსის, მარკუს ფეისონის და სხვათა შეჩება. ბელგიელებმა შარშან ორი თამაში სწორედ შორი სროლების წყალობით მოგვიგეს, ჩვენ მათი შეჩერება კარგი დაცვით მოვახერხეთ.

იგორ კოკოშკოვი:

„დავეთანხმები ჩვენი გუნდის კაპიტანს, რომ საქართველოსთვის ევროპის ჩემპიონატზე თამაში და განსაკუთრებით პირველ მატჩში გამარჯვება უდიდესი მნიშვნელობისაა. ბელგია ჩვენთვის კარგად ნაცნობი გუნდია, შარშან ორჯერ დაგვამარცხა და ვიცოდით, რომ თუ მთელი მონდომებით არ ვითამაშებდით, გამარჯვებას ვერ მოვიპოვებდით. საბედნიეროდ, ჩვენ მოვახერხეთ მეტოქის ფორვარდების შეჩერება, რაც გუნდური თამაშის დამსახურებაა.ეს გამარჯვება გასახდელიდან გამოსვლის შემდეგ უნდა დაივიწყოს ყველა მოთამაშემ და მომავალი შეხვედრისთვის მოვემზადოთ.

რუსმა ჟურნალისტებმა ზაზა ფაჩულიას მომავალ მატჩზე დაეკითხნენ და იმით დაინტერესდნენ, მივიდა თუ არა საქართველოს პრეზიდენტი გამარჯვების შემდეგ გუნდთან...

„არა აქვს მნიშვნელობა, რუსეთის ნაკრები იქნება თუ ნებისმიერი სხვა, ჩვენ მაინც სრული მობილიზებით ვემზადებით ხვალინდელი მატჩისთვის – განაცხადა ფაჩულიამ – რუსეთს კარგი გუნდი ჰყავს, მაღალი კლასის მოთამაშეებითაა დაკომპლექტებული. ვნახოთ, ვიბრძოლებთ, ვითამაშებთ და ღირსეული გაიმარჯვებას. ჩვენს ქვეყანაში კალათბურთს ძალიან ბევრი თაყვანისმცემელი ჰყავს. ჩვენი პრეზიდენტიც გვერდში გვიდგას და გვქომაგობს. ის ქართული კალათბურთისთვის უმნიშვნელოვანეს მომენტებში ყოველთვის ჩვენთანაა და ახლაც გვესტუმრა. საერთოდ, ძალიან დიდი მხარდაჭერა გვქონდა ბელგიასთან მატჩში და მაყურებლის აქტიურობამ ძალიან დიდი მუხტი მოგვცა. მადლობა იმ ათასობით ქართველსა თუ არაქართველს, რომელიც მთელი მატჩის განმავლობაში გვერდით გვედგა.